[البارون]

الله الله على الموضوع الجامد جدا...
انا بقى هحكيلكم حدوتة من حواديت والدى , لانه كان متميز جدا فى الحواديت , ويارب تعجبكم...
حدوتة : الفلاح والزرع..
كان يا ماكان فلاح عجوز عنده حتة ارض , ومتعود يزرعها والارض تطلع حب وفول وشعير , وكل اللى يزرعه الفلاح يطلع كويس وتمام , وكان فى بلد الفلاح بير ميه , بياخد منها الميه , ويسقى الارض ...
وفى يوم من الايام راح الفلاح بعد ما دفن الحبوب فى الارض , راح للبير يجيب الميه لكن لقى البير مافهوش ميه , فقعد يفكر هيعمل ايه , وهيجيب لعياله اكل منين دا الزرع اللى بيزرعه هو اللى بياكل منه هو وعياله , ففكر وقرر انه يروح لحد غنى يساعده , فراح للتاجر , وخبط ع الباب لقى التاجر مش موجود , لانه راح يطلب مساعده من كبير التجار , فقال لما التاجر رايح لليساعده , انا كمان اروح لكبير التجار بدل ماطلب من التاجر اللى محتاج مساعده ...فراح لكبير التجار لقيه مش موجود لانه عند الوزير بيطلب المساعده , فقال اروح للوزير اطلب منه المساعده , مالقهوش موجود لانه عند السلطان بيطلب المساعده , فقال اطلب من السلطان , وراح للسلطان فتحوله الباب لقى السلطان قاعد على سجادة الصلاه ورافع ايديه للسما وبيقول يا رب ساعدنى , وراح باصص للفلاح وقال : اامر يا فلاح , محتاج ايه؟
فدحك الفلاح وقاله : انا مش محتاج منك حاجه .. انا هطلب من اللى انت طلبت منه , ورفع ايديه للسما وقال : يارب ساعدنى انا حرثت الاض , وزرعت الحب , ومش لاقى الميه ... يارب ساعدنى ...
راحت الدنيا مطرت مطر شديد , والزرع شرب الميه , وطرح حب وفول وشعير ...

الحكمه من الحدوته , لانه دى اهم حاجه كانت بالنسبه لوالدى : لا تعتمد على احد غير الله , لانه اكبر من كل شىء , وهو اللى عنده مفاتيح كل شىء تتمناه..
وتوته توته فرغت الحدوته .. حلوه ولا ملتوته...
بكره حدوته جديده ان شاء الله من حواديت والدى ..

[nooha007]

الله علي حواديت زمان يابيدوو روعه فكره هايله جدا
وتسلم ايدك ياسور والبارون علي حواديتكم المميزةجدا

[nooha007]

انا مش فكره اوي حواديت بس هقولكم اغنيه في حدوته
بتقول ايه
عمو رجب ده حكايته عجب


كان عنده بطه حلوة وجميله


بتبيض يوماتي بيضه دهب عمو رجب ده حكايته عجب
ياكل كنافه يشرب جوافه يلبس لبس شيك منغير تعب عمور رجب ده حكايته عجب
والبطه نايمه في عشها جاب سكينه وراح سنها مسك جناحها وحالا دبحها ملقاش فيها بيضه دهب عمو رجب ده حكايته عجب لكل من شاف لكل من شمع يقول الطمع قل ماجمع
بس بقي وانا صغيره كنت بقول لنفسي ايه طب مدام ملقاش فيها بيضه دهب كان البيض بيجيلو منين؟؟؟سؤال يطرح نفسه هههههه

[البارون]

حدوتة اليوم.................. 11/1/2009]

الارنب الطماع

كان يا ماكان فى سالف العصر والاوان راجل فلاح , عنده ارنب وحمار , وكان يخرج الفلاح فى الصبح بدرى , ويرجعلهم باكلة (البرسيم) , ويقول : كل يا ارنب .. كل يا حمار ., بس الارنب طماع بسرعه ياكل من ناحية الحمار قبل ما ياكل من ناحيته , ويقول للحمار : ايه دا يا حمار بالراحه الاكل ماتاكلش بسرعه , وتخلص كل الاكل , والحمار يستغرب هو ليه الارنب بيقول عليه كدا ليه ( علشان طماع ) بس الحمار مايعرفش انه طماع , ويخلص الارنب كل الاكل , وبالليل وهو قاعد ويا الحمار قال الارنب : هحكيلك حدوته .
فرح الحمار وقال : ايوه احكيلى .
قال الارنب : كان يا ماكان زمان كان فيه حمار شاطر , كان صحيح حمار لكن كان اشطر الشطار , كان صاحبه ياخده يربطه فى الساقيه وهو حمار بقى يلف شغال فى الساقيه .. يحط الفلاح عليه الاوزان , وهو حمار بقى يشيل مايقولش لاء , يربطه الفلاح فى المحرات , وهو حمار بقى يشد المحرات..
وكمل الارنب وقال : لكن كان هو صحيح حمار , لكن كان اشطر الشطار , ومره واحده الحمار اللى هو اشطر الشطار قام حادف نفسه , ووقع نفسه جوا البير , وجه الفلاح يشيله , وينيمه ولا يحطه فى ساقيه ولا فى محرات , ولا يحط عليه اوزان , وكل يوم يجبله الاكل لحد عنده وياكله الاكل فى بقه , والحمار مرتاح ومش تعبان ولا بيشيل ولا بيحط , وبس بياكل....
وتوته توته والارنب خلص الحدوته .
قام الحمار قاله : انا كمان لازم اكون اشطر الشطار , وتانى يوم مره واحده راح حادف نفسه جوا البير , والحمار الخايب راسه اتخبطت جوا البير , ورجليه اتكسرت عشان خايب وسمع كلام الارنب الطماع , راح جه الفلاح وجرى عليه وشاله من جوا البير , والارنب كان فرحان وسعيد خلاص دلوقتى الحمار مكسور وهيقدر الارنب ياكل كل الاكل , وكمان يمكن الحمار يموت , والارنب ياخد راحته على الاخر فى الاكل.
والفلاح قال : لازم نجيب الدكتور , وجه الدكتور وقال : الحمار ضرورى لازم يشرب ( شوربة ارنب) , ولو ماشربش (شوربة ارنب ) الحمار ساعتها لازم هيموت , والفلاح خايف على حماره اللى بيزق الساقيه , ويشد المحرات , ويشيل الاوزان , ويقوم يجرى ورا الارنب الطماع, والارنب الطماع يجرى , يمسكه الفلاح ويعمله (شوربه) يشربها الحمار ويروق .... ومن يومها والحمار مايسمعش اى حدوته يقولها اى (مكار).

الحكمه من حدوتة اليوم : ( اياك والطمع لانه الطمع بيخلى صاحبه ايه ؟ ( شوربة ارنب) )


تحياتى للجمييييييييييييييييييييي ييييييييع

[بيدوو]

الله الله الله يا مصطفى ابدعنا يااااااااااه بجد لو مش فكرتى كنت اديت صاحبها هديه ههههههههههههههههه
تسلم ايدك ومنتظرة الباقى